【馮仁昭四圍超】志雲毛主席　受崇拜加場

【蘋果日報】陳志雲近日除咗為翻生嘅亞視主持全新一輯《百萬富翁》外，下月18日至21日仲會同前港台DJ倪秉郎喺尖沙嘴文化中心劇場演出5場舞台劇《主席萬歲》。日前志雲同倪秉郎喺新蒲崗為部劇綵排，劇中志雲飾演戲癡報販「陳四茂」，倪秉郎扮演臨記阿頭，講佢哋返內地拍戲，但飾演毛主席嘅演員突然死咗，搵咗陳四茂頂替，因扮得太神似，所有村民對佢極之崇拜，真係「真的假不了，假的不得了」。志雲笑住話：「我係扮1928年嘅毛主席，即係《建軍大業》劉燁飾演嘅毛主席，我聽到係非常樂意接受呢個挑戰。」
重溫毛語錄
倪秉郎就話：「套劇係講兩個嘅友情，現實生活嘅真假，不過我哋借毛澤東同蔣介石嘅關係演繹成個故事。」
志雲為咗演好角色而重溫毛語錄，發現有好多金句幾有意思：「呢套劇有句對白『世界上沒有無緣無故的愛，也沒有無緣無故的恨』，毛主席講㗎，我憎你係有原因，我愛你亦都有原因。」另外，舞台劇反應熱烈，製作單位「劇團空間」加開21日夜場，今日發售。
撰文：馮仁昭