【馮仁昭四圍超】電眼冧妖記偉仔金甲出千不敗

【蘋果日報】梁朝偉早排因為演得憂鬱文藝片太多，搞到怕怕，所以想拍啲輕鬆電影。2018年賀歲電影《捉妖記2》嘅國際版預告最近曝光，打頭陣係新加入捉妖大家庭嘅梁朝偉。多年冇拍古裝嘅偉仔，今次唔只着古裝，仲有一個全身金甲嘅造型，唔好以為好霸氣，原來都係搞笑嘅一部份。戲中飾演電眼賭徒屠四谷嘅偉仔，原來一直夾埋細細粒嘅骰子妖出千，所以先可以喺賭枱上面做長勝將軍。
做妖怪爸爸
偉仔嘅隨身法寶除咗一對電眼，仲有一套能夠幫佢金蟬脫殼嘅長勝金甲，偉仔話：「我喺賭坊時着到好似將軍，閃令令好矚目。套甲胸口有『長勝』兩隻字，我額頭又有條長勝頭巾。一有人捉到我出千，套金甲會即刻幫我閃人。」故事中小妖主角胡巴，同白百何、井柏然失散，四處流浪嘅胡巴遇上偉仔，仲有超大隻嘅新妖笨笨。平日見錢開眼嘅偉仔，其實內心善良，於是臨時擔起妖怪爸爸嘅重任，保護胡巴，一人兩妖全程鬥氣搞笑。胡巴喺預告片尾仲好鍾意偉仔，鍾意到要用妖界示愛法表達愛意，就係吐口水。
撰文：馮仁昭