LV尖嘴店 銷量拍住巴黎總店

【明報專訊】自由行同胞嘅威力，確係愈來愈勁。小琴聽聞，LV喺尖沙嘴廣東道嘅香江龍頭店，某幾個月份啲生意額，原來係全球LV店收入之冠，即係話，連位於巴黎香榭麗舍大道LV總店嘅生意額，都喺某幾個月份輸畀香港分店。

小琴心想，國際名店唔只喺香港開店，喺內地大城市都有開店，點解，自由行同胞咁鍾意來香江名店買嘢。當然，內地有奢侈品關稅，香港係自由港零關稅，固然係原因之一。之不過，原來有香港有另一項超級優勢，就係人嘅質素。

小琴收到風，內地有兩間不同品牌的超級名店，都出現過售貨員，施展偷龍轉鳳嘅怪招，明明客戶去咗內地某國際名店買正貨，點知售貨員出蠱惑招，銷售過程中把真手袋換咗冒牌袋，然後交畀個客，結果出現客人去正牌名店，買到假貨嘅慘况。

另一案例係發生喺內地一間英國名店，有位客戶攞住件乾濕褸投訴，話個領位有損毀，要換，點知經理一check之下發現件貨係偽品，咁經理自然幫佢核對帳單，發現帳單係真的，終於揭發出又係售貨員偷龍轉鳳，真店賣假貨的另一例。

有友人同小琴講，內地人來港買名牌，除咗省掉關稅，慳夠一轉水腳當做旅費之外，更重要係信心，起碼嚟到香港名店大可放心買，唔會買到假貨。

報料電郵﹕piano@mingpao.com