城電派1.9個月花紅 可用花紅換假期

【明報專訊】城市電訊（1137）喺聖誕之前大派聖誕禮物，宣布向逾3200名員工，發放平均相當於1.9個月花紅，獎勵一班員工幫公司成功達成營運目標，所以同員工分享成果。部分優秀員工更加有2.5至5個月花紅。公司仲首次推出「Work Life Upgrade」計劃，員工可以選擇用半個月花紅，換成10日假期，城電講，計劃希望員工可以用更多時間，實現夢想，充實人生咁話。

至於今年加幾多人工，就屬未知之數，事關城電一向喺新財政年度，先會調整人工。翻查紀錄，「電訊魔童」王維基主理嘅城電，之前出手一啲都無手軟，好似舊年年底都派咗平均約2個月花紅，2008年就有平均約1.2個月花紅。

大家梗係會諗，咁善解人意嘅公司喺邊度搵。不過，小琴提醒大家，城電每年都會將表現最差嘅員工炒魷，人數都唔係少，佔員工總數5%，所以話，針無兩頭利，最緊要勤力。