愛穿Deep V晒事業線宋昰昀被爆學生相傳整容

【蘋果日報】現年31歲嘅韓國女星宋昰昀，早前因演出人氣劇《三流之路》而人氣上升，加上近日又落實接拍新電影《完美的他人》，立即引來網民關注，同時被公開學生時期嘅舊相，不過由於個樣同依家有啲唔同，因而被指疑似整容變臉。
於網上公開嘅舊相中，當時仲係單眼皮嘅宋昰昀，跟現時嘅精靈大眼相距甚遠，網民都留言「對比佢以前及依家嘅照片，發現真係幾大區別，肯定整過容」、「唔同咗樣」等，不過宋昰昀就未曾公開承認過整容。
宋昰昀早於2003年就拍劇出道，曾跟Rain、孔孝真等人拍攝韓劇《小爸爸上學去》，又拍攝過《命運在我手》，加上因為身形嬌小而且長相甜美，不時被網民大讃童顏，而身材有料嘅宋昰昀，現身活動時亦愛穿上deep V晒事業線。