58歲生日發哥唱歌　發嫂願望再讀書

【蘋果日報】周潤發老婆陳薈蓮（發嫂）昨日58歲生日，一班好友在尖沙嘴食飯為她慶祝，發哥發嫂着黑色情侶裝襯到絕出席，發哥開腔為老婆唱生日快樂歌，發嫂收到「神奇女俠」造型蛋糕好開心，發哥都讚：「好靚呀，靚到不得了！」發哥不停叫老婆：「許願啦！」當發嫂閉目許下生日願望後，發哥捉實老婆隻手齊齊切蛋糕：「生日一刀，心想事成！」
對鏡頭飛吻
友人不停叫發哥錫錫發嫂，發哥霸氣地說：「得啦得啦！」笑容燦爛的發嫂就對鏡頭飛吻。接着發哥送上一束鮮花，友人又叫他揸花影相，發哥笑問：「係咪有個足球員叫渣巴？」發嫂表示嫁給發哥後，每年生日都和老公一齊過，生命中有幸認識到老公。
問到生日願望，發嫂話：「我生日都係接近年尾，每年都係一樣希望，就係我所識嘅朋友，包括我家人同自己，都有好好嘅身體，先可以追求我哋嘅理想；至於我嘅生日願望呢，就係將來有機會，我希望可以再讀書，呢個moment我有三樣嘢想學，就係business、體育同教育，體育係我未讀過嘅嘢，自己亦好希望教小朋友讀書，到時睇我嘅時間可以讀邊個課程。」
採訪、攝影：鍾國仁