發哥搵食搵到趙雅芝約埋方中信智叔跑山

【蘋果日報】許文強同馮程程RE-U？
又拍《上海灘》？唔係啩？唔好又整套中港合拍《2018新新上海灘》喎…
趙雅芝前日喺微博貼咗幾張發哥突擊探班嘅相，寫道：「文強來探班，大家都雀躍不已！發哥還製作了一張黑白效果圖片。」有圖有真相，只見發哥好親切咁攬住趙雅芝，同場仲有《八個女人一台戲》導演關錦鵬、著名美指文念中，梁詠琪同周家怡。發哥一身跑山look，笠咗個頭箍，額前長髮就好似窗簾布咁呈拋物線再跌番落嚟，相當趣致。
趙雅芝就話，佢哋喺元朗開工期間，發哥帶埋燒鵝探班，之後再去跑步，跑完又返番嚟同馮程程再續未了緣。其實發哥俾人「捕穫」都好正常，呢期就更加，因為佢依家成日約埋新戲《無雙》嘅crew，同埋方中信、智叔廖啟智等成班人浩浩蕩蕩日日去跑山，足跡遍及香港九龍新界離島。
據知發哥依家每朝六七點左右就吹雞開跑，跑到咁上下，餓喇，就要搵嘢食啦。呢個，係重點。
嗜吃嘅發哥，去到每一個check point，都一定一定一定唔會錯過嗰度著名小食／美食，由深井燒鵝到西貢海鮮，大帽山茶水亭蓮姐，發哥決不錯過；加上成日撞到行家拍戲，於是佢就順便買埋美食探班，分甘同味。邊度有好嘢食，邊度就有發哥，佢最鍾意就係幫趁小店，捐窿捐罅難佢唔到。
啱吖，呢頭跑完，嗰頭搵好嘢食，唔食嘢又邊度有energy跑步喎！所以下次撞到發哥，selfie完之後，不妨問下佢去咗邊度搵食啦！