馬明同心穎慶祝生日黃長興慘變電燈膽

【蘋果日報】馬國明以往拍拖好少咁高調，自從同黃心穎食飯睇戲，馬明將戀情半公開，講起心穎BB時，個樣仲好甜絲絲，日前馬明憑《降魔的》拎最受歡迎電視男角色，雖然馬明冇當眾感謝心穎BB，不過行去領獎前，馬明都同心穎BB握咗手仔，當馬明講得獎感言嗰陣，唔少女藝人叫馬明快啲結婚，但係馬明就話冇咁快。
心穎BB之後貼出同馬明嘅合照，又話引以為傲，呢對圈中公認一對戀人，收到唔少fans祝福，前日係心穎29歲正日生日，馬明當然陪住佢，本來心穎只係喺IG貼咗一張單人相，留言：「This expression summarized my birthday!簡單的、溫暖的、開心的。多謝你哋嘅祝福！」
昨午黃長興喺IG貼出合照，相中有心穎BB同馬明，見佢哋坐埋一齊，心穎仲笑得好sweet，許多網民都笑黃長興竟然做「電燈膽」，其實係一對戀人去咗黃長興同友人合資開嘅法國餐廳撐枱腳，過二人世界咋。