《藍色生死戀》主角感情路大不同喬妹甜蜜宋承憲分手收場

【蘋果日報】韓國經典劇集《藍色生死戀》於2000年9月首播，劇情講男女主角原先係兄妹，點知原來女主角即宋慧喬細個時被調包，事實上同男主角宋承憲係冇兄妹關係，佢哋大個咗重遇後發現兩人感情非親情咁簡單，更愛得要生要死。喬妹因為患上血癌而決定忍痛離開宋承憲，更喺宋承憲背上離世。失魂落魄嘅宋承憲出席完喬妹嘅喪禮後，被快車撞死，留下悲傷不已嘅結局。
雖然《藍色生死戀》劇情離不開老土韓劇情節，但卻贏盡劇迷嘅眼淚，亦令到劇中主角宋承憲、喬妹、元斌同韓彩英都走紅，而呢股韓劇熱仲開始吹到去亞洲各地，今年《藍色生死戀》踏入播出第18年，當中四位主角現時仍喺娛樂圈發展，而佢哋嘅感情生活大部份亦過得相當不錯。
好似喬妹咁，佢去年同神劇《太陽的後裔》男星宋仲基舉行世紀婚禮，宋仲基無時無刻都表現得對愛妻呵護備致，唔少人都羨慕喬妹能覓得真愛，同佢喺《藍色生死戀》嘅悲慘結局真係好唔同。
至於另一男主角元斌，現年40歲嘅元斌於2013年被爆撻着女星李娜英，兩人於2015年秘密舉行婚禮，同年12月李娜英為老公誕下兒子，元斌喺《藍色生死戀》中癡戀喬妹，不過喺現實生活中，佢就樂做廿四孝老公同爸爸。
而現年41歲嘅宋承憲喺劇中悲劇收場，喺現實生活中佢嘅感情路都唔多順暢，而且多次與同劇女星傳出緋聞，好似先後同崔智友、喬妹、成宥利、孫藝珍及李沇熹都傳過緋聞，不過就從未公開戀情，直到大前年先認戀大陸女星劉亦菲，不過呢段中韓戀只係維持咗兩年半時間，前日宋承憲方面仲直認因為各有各忙關係，已經同劉亦菲分咗手，令呢段中韓戀最終無疾而終。
另外，喺劇中飾演同喬妹調包嘅韓彩英，佢喺劇中雖然就等唔到元斌嘅愛，但佢喺現實生活中就十分幸福，佢於2007年同大佢四歲嘅企業家結婚，婚後6年於2013年8月剖腹產子，現時佢專心做少奶奶外，亦有喺幕前演出。