【馮仁昭四圍超】鬧俾老公呃咗楊張新悅41歲陀第四胎　

【蘋果日報】現年41歲嘅楊張新悅07年嫁區議員楊哲安，婚後育有三女。噚日楊張新悅喺facebook上載咗一條自編自導自演「電台」訪問片，宣佈再有喜。佢話：「近日好多人發現我拒絕佢哋嘅活動，特別係夜晚嘅派對，更有人覺得我好唔畀面佢哋，我想講聲抱歉，令大家有所誤會。」
緊接楊張新悅就全家演出《一不小心2018大肚婆》MV，用歌聲公佈再陀第四胎，歌詞仲大呻做媽咪辛酸：「一不小心又有咗囉，感覺很惆悵，明明話三個夠，點知俾老公呃咗。」仲話未知陀仔定女。
「我好惆悵」
楊張新悅噚日接受電話訪問：「完全冇諗過生第四個，睇完條片都知係唔小心，做三個嘅媽咪已經好辛苦，估唔到個天畀多次挑戰我，其實本來想好低調處理呢件事，但街上嘅人開始發現我個肚凸出嚟，佢哋覺得我好似好肥咁，我接受唔到人話我肥，咁惟有話畀大家聽啦。」佢仲話首歌係送畀所有大肚婆同媽媽：「我都有經驗同感受，相信大家都會好認同。」佢又爆老公諗緊為BB改名：「佢好興奮，好似個小朋友咁，興奮過我一百倍，而我就好惆悵同好嬲佢。」
撰文：馮仁昭