中國科網新股雄霸花旗

【明報專訊】姑勿論中國嘅法治同人權幾咁令人沮喪，但响全球投資者心目中，「中國製造」就係銷量保證。且看今年花旗大國嘅新股表現，頭十位升勢最勁嘅新股當中，有4家係中資股，即係差不多霸咗一半席位。呢4家表現最佳嘅「國寶」，全線較上市價累升超過1倍，當中排位最高（十大中排第二）嘅係海輝軟件（HiSoft），6月上市至今已累升2倍。

優酷網累升1.7倍

而最廣為我國「宅男宅女」歡迎嘅優酷網（Youku），本月初首日掛牌爆升61％之後，至今亦累升1.7倍。根據紐約交易所嘅統計，今年埋單總共有34家中資股响美國上市，當中有68％股份，首日掛牌都有升勢。

不過，噚日《華爾街日報》就有篇報道，話雖然花旗國投資者對中國製造嘅新股興趣甚濃，奈何家陣環球資金西向東移，好多早已响美國上市嘅中資股，例如泰富電氣等，都想私有化後回到亞洲地區（尤其係香港）上市，因為香港畀到較高嘅市盈率，可以合理反映公司估值云云。

中資科網股醉心納斯達克

香港今年嘅新股集資額雄霸全球，好多原本已在美國、英國或新加坡上市嘅中資股，都心郁郁想係香港上市，唯獨一眾中國科網股，仍然醉心到美國納斯達克上市。今年响美國集資嘅內地科網股，除咗優酷，仲有內地最大網上書店當當網，與優酷同屬國產Youtube嘅土豆網，亦已經申請去美國上市。似乎香港當年成功拉攏到阿里巴巴（2688）來港集資後，仲未能做到聲勢吸引其他後來者，呢方面港交所（0388）可能要諗諗計。

報料電郵﹕piano@mingpao.com