【馮仁昭四圍超】樂瞳簽名會　搞旺漫畫店

【蘋果日報】樂瞳噚日走入信和一漫畫店，為去年推出嘅寫真《See La Cilla》加印舉行簽名會，女神未現身，已經有fans早到兩個鐘，店外有半百人排隊加圍觀，樂瞳對於俾fans重重包圍，既興奮又感動，而漫畫店老闆亦特別託咗位本地漫畫家，為樂瞳製作「英雄所見樂瞳」揮春派發。
想出文字書
對於之前有報道指呢間漫畫小店，要靠賣女星寫真維持租金，其中最好賣嘅寫真集就係樂瞳去年推出嘅《See La Cilla》，樂瞳話：「之前睇到呢間店新聞，已經好想嚟支持吓，但突然過嚟又唔好意思。」適逢書商決定加印，所以造就今次機會舉行簽名會，問到漫畫店要以賣寫真或其他產品維生，樂瞳話：「我都覺得啲人少咗睇書，令店舖要賣好多唔同產品維生，我本身鍾意小店同實體店多過網上購物，希望大家多啲支持小店。」反應咁好，會唔會再出寫真？佢話：「暫時賣埋呢本先再睇吓，我就希望出本文字書。」據知今次這間漫畫店老闆再入200本樂瞳寫真，大約一個禮拜已賣出大半，反應依然好。
撰文：馮仁昭