超人「粉絲」履歷出眾

【明報專訊】有位自稱香港留學生的楊嘉美，本周三自費喺本報刊登廣告，讚揚本港首富李嘉誠慈善行動同理念一致。原來呢位超人「粉絲」，履歷出眾，佢曾經喺胡關李羅律師行實習，又喺知名嘅美國洛克菲勒家族成員、美國參議員Jay Rockefeller及本港立法會議員譚耀宗辦事處實習。

呢個全版廣告，題目係「美國看李嘉誠先生的慈善行動與理念」，洋洋千幾字，楊嘉美話睇到本港仇富情緒嘅新聞，開始關注各富豪嘅慈善行動同理念。佢留意到李嘉誠發展事業又投入慈善項目，甚為值得尊敬。廣告上登有楊同學個人照片，楊同學擔任芝加哥大學學生會副會長、聯合國學術影響工程嘅美國學生代表、吉林青聯副主席。

自費登全版廣告撐超人

小琴心諗，青聯係有番咁上下地位嘅人，先可以加入。本港青聯嘅成員，主要係富豪第2代，本港青聯副主席包括鄭志剛、霍啟剛。

此姝咁勁，小琴自然要搵料，終於喺互聯網搵到楊同學嘅履歷，發現佢把握暑假時間，參與好多機構工作。佢洋名叫MAY，家喺芝加哥大學讀緊政治同視覺藝術，將於2012年畢業。 每年暑假佢都做實習工作，2008年返香港，喺譚耀宗嘅辦事處實習，參與選舉宣傳活動；2009年就喺胡關李羅律師行實習，幫手做上市公司文件，佢仲係聯合國組織、芝大教授做研究工作。

小琴佩服呢位年輕人，花錢賣廣告表達意見。唔係咁多人有經濟能力，即使有錢，都未必會將啲錢消費喺呢類項目。小琴都想知道，佢點解選用賣廣告表達意見？佢曾經喺聯合國周年大會，做過學生記者，唔知佢會唔會考慮加入報界，採訪偶像李嘉誠呢？

報料電郵﹕piano@mingpao.com