公司掛牌上市袁彌明難忘當年親去咖啡店交收

【蘋果日報】現年37歲、2005年參加港姐僅得豬肉獎嘅袁彌明，昨早喺香港交易所敲鑼，一手創立嘅彌明生活百貨（8473）掛牌上市，升呢上市公司CEO，老公林雨陽同家人撐場支持。


袁彌明開心分享感受：「我要喺呢一個咁有意義嘅地方，多謝香港聯交所。」佢回想9年前係one-woman-band，現時發展到擁有9間專門店，市值約三億港元。


之後袁彌明再接受《蘋果》電話訪問，難掩興奮心情：「好開心，終於夢想成真，我真係由細到大，好想做實業家，終於做到，仲可以上巿，不過我仍然好難忘當年，親自去咖啡店交收情況。申請上市過程漫長艱辛，終於守得雲開見月明。」


袁彌明當年落選後加入大台劇做過一啲花瓶嘅角色，2007年離開無綫，佢算係第一代美容YouTuber，先做網上買賣護膚品，仲要親自約客人咖啡店交收，跟住開咗一間樓上舖，又試過從政。經過9年努力，佢旗下公司成功上巿。