34D女友晒三點式張振朗隔空唱︰給我一個吻

【蘋果日報】大台近年走咗好多男一，被指貌似黃宗澤、現年30歲嘅張振朗就有機會上位喇，最近接拍《包青天再起風雲》飾演展昭一角，都可以話坐正，唔使再做二、三線。
為咗唔好影響事業，張振朗同擁有34D巨胸小花陳芷尤嘅戀情都要低調啲，雖然曾爆於深井同居，又唔小心洩露一齊去阿姆斯特丹旅行，上周六仲一齊入馬場添，但兩人仍死口唔認係拍拖。
男友努力工作，女友冇咁忙，當然要嘆吓世界啦！近日陳芷尤就約咗兩個女仔朋友一齊去印尼旅行避寒，陽光與海灘，着泳衣騷身材亦係例行公事。前日芷尤喺ig story拎住個椰青拍片，但焦點就落咗喺佢件好sharp嘅黃色泳衣度，仲有條3吋長嘅事業線，非常癢眼。
而張振朗前日就要喺錄影廠開工，日而繼夜咁工作亦需補充體力，見佢沖咗杯牛奶飲;之後就趁休息時間，扮鬼扮馬高歌一曲﹕「給我一個吻，可以不可以？」唔知係咪隔空唱俾女友聽呢？！