雨潤祝義才膺胡潤殺豬王

【明報專訊】新年流流又是一眾乜乜物物排行榜嘅公布時刻，堪稱「國產」《福布斯》排名榜嘅「胡潤」，唔知係咪排富豪排到悶，呢期竟然搞搞新意思，做咗個「胡潤殺豬榜」。顧名思義，有能力問鼎殺豬榜，榮登做新一代「殺豬王」嘅猛人，一定係年內殺豬殺得最多嘅一人。

咁，究竟2010年度「殺豬王」誰屬呢？（燈燈燈櫈）結果係，雨潤集團（1068）董事長祝義才，佢以一年磨刀霍霍生劏2500萬頭豬嘅佳績，成為新一屆「殺豬王」。屈居亞軍嘅有大眾食品董事會主席明金星，共劏咗2200萬頭豬。至於內地富豪新希望集團董事長劉永好嘅家族，一年內只能劏到850萬頭豬，成績差咗一大截，只能排名第三。

傳聞呢個殺豬榜嘅統計方法頗為科學化，胡潤研究院調查晒內地民營豬屠宰企業，根據佢哋嘅每年屠宰量，得出「殺豬」能力最強嘅最後15強，之後再在當中選出年度「殺豬王」。呢最後15強每年平均可以屠宰超過618萬頭豬，屠宰能力絕對不容忽視。

富豪榜曾被謔稱殺豬榜

查實，胡潤搞呢個「殺豬榜」，都唔知係咪有心自嘲，定係想同「富豪榜」分工。事關近年胡潤「富豪榜」畀內地人譏為「殺豬榜」，因為上得富豪榜嘅人，出咗名實無好下場，應驗晒「人怕出名豬怕肥」。家陣胡潤自家搞個貨真價實嘅「殺豬榜」，咁以後大家咪唔會再稱「富豪榜」為「殺豬榜」囉，胡潤都算用心良苦。

報料電郵﹕piano@mingpao.com