中大酒店學生 未學成先學飲

【明報專訊】中文大學同新世界發展（0017）合作，起咗間教學酒店喺大學站旁邊，由凱悅國際集團經管，呢間酒店提供正常餐飲、住宿服務，亦提供實習場地畀中大酒店及旅管理學院嘅學生。酒店旁邊就有教學大樓，今日舉行命名典禮。

親身試味 經驗介紹畀客

聽中大公關講，教學大樓有食品實驗室，仲有品酒實驗室，有得食又有得飲。呢兩個實驗室，係教學生學習點樣將美食配美酒，介紹畀客人，學生亦要知道餐桌擺放方法。學生要識得介紹畀客人，首要係自己都飲過、食過，知道味道如何，睇嚟佢哋都要練定酒量至得。除咗識飲識食，仲要識得管理，教學大樓開咗間餐廳，要學生自己經營，決定入貨、餐牌、價錢，落手落腳體驗做管理層。