鄭海泉2012前不言休

【明報專訊】人逢喜事精神爽！呢句說話套用喺匯豐中國董事長鄭海泉一啲都無錯。小琴知道佢之前一直抱恙在身，之前匯控（0005）位於上海嘅總部揭幕、業績會等都未見佢出現，連今年董事局喺上海召開董事會，選出新任主席、行政總裁，都唔見佢嘅蹤影，噚日卻喺中文大學教學酒店開幕時見佢出現，因為佢係中大校董會主席，可見佢都心繫中大，佢仲話2012年前誓不言休呢！

洋名Vincent嘅鄭海泉休息咁多個月，原來佢仲已經復工咗幾個月㖭！但就係少出席公開場合，所以小琴都好耐無見佢，見佢真人精神都好唔錯。

其實Vincent都已經62歲，已過咗匯豐定落嘅60歲退休之齡。財金界精英例如前金管局總裁任總任志剛、前恒生（0011）副董事長兼行政總裁柯清輝，退休後都繼續再闖高峰，Vincent又會唔會想退休再搵嘢發展呢？但佢就話而家未有退休打算，仲話2012年前誓不言休，幾時退休由董事會話事喎。

匯控中國上市時間 仲未扑槌

大家等待匯控返內地掛牌上市等到頸都長，但一直都未有聲氣。Vincent雖然拍心口話有信心上海國際板今年可以出台，但就難講匯控喺中國上市計劃，上半年能否完成。匯控係香港人嘅心水愛股之一，不過近年表現麻麻，股價呢期喺80蚊呢個樽頸位唔上唔落，Vincent相信，如果匯控去內地掛牌，都會受到中國同胞股民嘅歡迎。

報料電郵﹕piano@mingpao.com