楊冪同男密友遊環球影城網民問「不陪老公小孩」

【蘋果日報】初初拍拖係熱戀期，婚後就係適應期，好似劉愷威同楊冪剛拍拖時亦常喺社交網放閃，人前恩愛，2014年結婚，5個月後生咗囡囡「小糯米」，點知婚後劉愷威同楊冪被指貌合神離，兩夫妻各有各忙，聚少離多，快速戀愛節奏過後，屢傳婚變。


而楊冪去年承諾會抽時間陪家人，前日就有網民影到戴黑色口罩、着螢光綠衛衣嘅楊冪，身在大阪環球影城，相中見楊冪與好友張大大正在排隊，楊冪童心未泯，頸掛住一個Minions爆谷桶，左手拎住手機，唔少網民都留言問楊冪點知唔同老公劉愷威或囡囡「小糯米」結伴外遊，又問為甚麼不跟囡囡「小糯米」去樂園。


另有楊冪粉絲就代偶像解釋，稱楊冪係出外工作，順便輕鬆一下，而且助手有同行，指「她在家跟孩子一起又不會時時刻刻出來說」，有粉絲更反問難道一個女人結咗婚，就唔可以有私人時間。有傳今次楊冪去日本影雜誌相，先趁機同好友四圍行。