囡囡奪金牌　莫少聰心情激動

【蘋果日報】現年57歲嘅莫少聰前年坦認與內地妻孫雲玲離婚，二人因年齡差距、文化差異同性格不合，令夫婦關係疏離，孫雲玲提出離婚，放棄女兒撫養權，囡囡莫芷嫣由莫少聰照顧，莫少聰之後有種茶同做慈善，閒時都有陪住囡囡，原來囡囡好鍾意溜冰。


莫少聰昨日貼出囡囡參加喺北京舉行嘅2018「天神杯」花式溜冰比賽的照片，並留言：「努力是有回報的，芷嫣這兩天的滑冰比賽，終於拿下兩枚金牌，此刻的心情我也有少少激動。」相中見囡囡遺傳咗爸爸一雙大眼同雙眼皮。


呢個比賽有來自內地各地超過700名選手參加各個組別比賽，囡囡可以脫穎而出，作為爸爸嘅莫少聰當然好開心。莫少聰2011年喺北京吸食大麻被捕，兩周後獲釋，曾因涉毒被大列入黑名單，事業遇上低潮，同年佢與內地歌手孫雲玲喺香港結婚生咗囡囡，點知婚姻只維持咗5年，幸好莫少聰現時已獲「解封」，可以接拍戲劇，獨力照顧囡囡。