平安「闖關」兩次張繼聰感恩報喜

【蘋果日報】張繼聰昨日凌晨貼出自拍照，高舉V手勢，留言：「懷住感恩嘅心向大家宣佈，2次！今日來回都順利過關，我覺得好幸運，不過明白幸福唔係必然，我會抱住謙卑嘅心去迎接下次嘅關口。」佢仲話明明張證係堅，但過到嗰吓有僥倖嘅感覺，反問係咩人生。事緣佢張回鄉證四年前影，嗰陣冇留鬚，每次上內地做嘢，過關都會被扣查，成日聽到後面有人講：「喂！嗰個張繼聰被人拉咗喎！」通常出示埋身份證仲大件事，張身份證嘅相係十幾年前影嘅，由於張身份證同回鄉證又未到期換，呢個情況係唔會改善，佢更澄清自己冇走私、冇被人拉，只係證明唔到自己嘅身份，搞到每一次過關，每一次過關，拎住回鄉卡就有啲「心虛」，試過笑住過關、又試過扮認真、扮到精神啲嘅樣，「命運」都係一樣，直接被叫入房。