新聞類別
財經
詳情#
【明報專訊】2011年內地投資熱點係乜？利豐集團旗下利豐研究中心昨日披露160位專家投票選出的中國商業十大熱點。其實，十點幾乎都是關於兩個字「消費」。這麼多消費熱點中，有一點小琴深有同感，不可不談：網上購物和團購已在內地出現爆發性增長。
呢排與行家交流，發現愈來愈多人變咗淘寶迷或者是團購粉絲。小琴自己呢， 上到圍巾下到拖鞋，都有過成功「淘寶」的經歷，「走順豐」速遞來港，運費也只是幾十塊。小琴仲識得個朋友裝修時連燈具、瓷磚都「淘」來香港，慳翻幾千元。其實內地網購，除咗淘寶、噹噹、卓越呢啲先驅，都有愈來愈多百貨連鎖店加入。利豐話，全國連鎖百強企業中，舊年有35家開設網上交易，兩年間增加4倍。而舊年網購銷售總額達到5000億，佔零售總額3%，看來，發展潛力仲係好大。
網購團購大熱
至於團購，小琴都有幫襯ubuyibuy呢啲網站，從facial到自助餐到健身課程，都比市價平一半以上。據小琴所知，香港團購網站不過十數家；但內地就真正不得了，利豐指，由舊年3月到9月，半年間團購網站從3、5家猛增至1500家，每日覆蓋人口超過1000萬。
食品安全機制擴展
另外，身為毒奶粉、假雞蛋等的故鄉，內地促進內需仲有一個令人驚喜的熱點，今年要大力擴展「食品安全責任鏈條機制」。一淡菜一塊肉，如有質量問題，都可追查清楚。希望更多人發現呢個商機，多多投資啊。
回應 (0)
