年代賣殼成功 大刁等住嚟

【明報專訊】體操王子李寧早排玩財技「失手」，佢控股嘅非凡中國（8032）收購李寧（2331）單刁畀港交所（0388）創業板上市委員會裁定為反收購，非凡中國家仲上訴緊。近年港交所對於借殼上市呢家嘢收緊咗好多，舊年芸芸借殼例子之中，好似得喺內地做機電設備嘅鄭州四維，成功借殼年代國際（8043）登陸港股。

年代國際財務總監梁家和噚日同小琴茶敍時就爆料，話為咗借殼呢單刁，來來回回搞咗成1年有多至搞得掂，足證上市委員會做嘢幾咁嚴謹。

講返年代，舊年獲注入嘅鄭州四維主要係做煤礦用嘅液壓支架，公司早排仲得到中國神華（1088）核准，有機會成為神華嘅供應商之一，梁家和估計，今個農曆新年前就會知道呢位煤炭「一哥」落唔落單。佢又話，神華2009年採購液壓支架用成25億人仔，今年估計有關開支會增至40億，所以呢位客人一旦落單，相信會係億億聲喎。