【馮仁昭四圍超】游學修激讚女神Stephy爆方力申零慰問

【蘋果日報】鄧麗欣（Stephy）、游學修、林耀聲同導演薛可正前晚喺銅鑼灣出席電影《起底組》煞科宴。剛失落金像影后嘅Stephy笑住話獲頒最佳衣着獎，對設計師都算有交代：「失獎唔失望，但有少少失落，好似做完一個大騷，有啲失落感。」Stephy話回憶好深刻，事後收到好多短訊安慰，但獨欠前度方力申份。不過佢都多謝小方喺大前晚另一活動時讚佢後生。反而Stephy戥《空手道》導演杜汶澤同合作過演出《藍天白雲》嘅新演員梁雍婷唔抵，佢話：「其實《藍天白雪》都有唔少提名，好想梁雍婷攞，知佢拍得好辛苦，獎項係一個鼓勵。」
熟悉歌名
另外，喺《起》片中演宅男嘅游學修，煞科宴上大賣口乖，自爆係Stephy嘅忠實fans，講得出佢啲歌名，游學修話：「Stephy都知我鍾意佢，佢人又靚，係香港嘅女神。」佢仲講笑話會追對方。游學修話合作完《起》片後，試過膽粗粗搵Stephy幫手客串一套電視劇，點知佢二話不說應承。游學修話當時心情既開心又興奮，估唔到女神會親自回覆。
撰文：馮仁昭