大S陪囝囝踢波　汪小菲抱抱好溫馨

【蘋果日報】41歲嘅大S徐熙媛最近身體欠安，更一度傳出癲癇復發引致暈倒，需救護車緊急送院，小S徐熙娣都話家姐要住加護病房，最令人擔心仲係老公汪小菲呢句：「熙媛昨晚（上月27日）已經沒有甚麼危險了，但是身體狀況還是很不好，請大家給她些時間休息，謝謝！」
好彩大S吉人天相，出院後仲報喜、承認懷有第三胎，陀B約八周，更馬上復工，因為之前接咗唔少Job，為免影響進度，於是繼續開工。不過見佢仲同家人去埋越南，精神不俗，似乎已恢復元氣。
現身在台北嘅大S，刻下繼續拍攝內地綜藝節目，日前台灣《蘋果日報》仲影到腹部微隆嘅大S，現身信義區一個公園，同行仲有囝囝，陽光下散步。未幾汪小菲都嚟度，陪囝囝踢波，玩得不亦樂乎———但隨行仲有一隊crew，估計應該係拍緊嘢。
雖然懷孕約八周，已經見肚，但手腳仍纖細，下巴尖尖，穿牛仔褲顯得雙腿修長。事後大S回覆稱：「這份工作是之前早就談定的，因為公司已經簽約了，後來懷孕了還是必須要履行工作。」真係好專業。