【馮仁昭四圍超】「成龍個女」獲外媒報道網友勸卓林搵工

【蘋果日報】吳綺莉同成龍所生嘅18歲「小龍女」吳卓林，幾個月前玩失蹤，原來佢同30歲外籍女友Andi去咗加拿大。日前卓林同Andi仲自拍短片放上YouTube求助，全程講英文嘅卓林，一開始自我介紹話係成龍個女，又話因為雙親恐懼同性戀（homophobic parents），令佢哋求助無門，流落街頭成個月。
重述唔認老竇
因為卓林話係成龍個女，令事件引起國際主流媒體注意，包括美國《時人》、英國《每日郵報》、英國《太陽報》同日本《日刊體育報》等都陸續報道。其中《時人》報道內容入面，重述卓林3年前嘅訪問，當時講過唔當成龍係爸爸，卓林話：「他從未存在於我的生命，我絕不會把他當成父親。我不會說他是我爸，我只會說：喔，成龍，一個演員。」
唔少網民睇到報道後，都批評卓林利用成龍名氣，有日本網民話：「既然認為沒父女關係，就不應自稱是成龍女兒。」有啲就覺得卓林咁做係為錢，而英國《每日郵報》網站大部份網友留言，叫卓林搵工同希望佢能自食其力。成龍方面至今仍未有公開回應，而馮仁昭噚日搵過吳綺莉，但未有回覆。
撰文：馮仁昭