動識時尚：夏天揀乜顏色倪晨曦櫻花妝減齡

【蘋果日報】倪晨曦（Elva）前晚現身娛果facebook直播節目《動識時尚》分享春夏護膚，仲現場示範春夏「櫻花妝」、化妝減齡同補妝貼士，又自爆晚晚都敷mask，一星期敷足七晚，佢話：「我習慣係兩晚sleeping mask、四晚保濕同一晚美白，保濕好重要，晚上保濕，水分會好充足，朝早起身嘅時候會感覺白咗。」
Elva揀mask亦好有心得：「之前成日都會買韓國、日本嘅mask，但其實好多都有酒精成份，大家要注意，佢寫嘅成份有alcohol呢個字就唔好買。以前覺得好平又覺得幾好，十幾蚊一張，但係敷咗之後會覺得皮膚越嚟越薄，仲會好容易敏感，所以要小心。」
妝前紙巾印面
講到春夏用嘅護膚品，Elva都話好重要，佢仲即場示範春夏「櫻花妝」，呢個妝唔誇張又帶粉紅，仲教大家化妝前可以用紙巾印下令皮膚更清爽，佢話：「我會先用遮毛孔嘅base，主要搽喺鼻同埋T-zone，跟住會揀一啲nude color嘅eyeshadow，胭脂就用粉紅色同橙色，呢兩種顏色好配合春夏天。」
眼影顏色畫眉
之後，Elva教大家點樣搽胭脂可以減齡，仲教大家畫眉嘅時候點eyeshadow嘅顏色一齊搽，咁樣color tone會好統一。最後，佢有個出街補妝小貼士，佢話：「放啲碎粉喺個粉撲上面，然後搵紙巾包住帶出街。」