11月做人妻洪允花積極減66磅披嫁衣

【蘋果日報】曾演出韓劇《Oh My Venus》飾演申敏兒秘書嘅29歲喜劇演員兼諧星洪允花，前年獲拍拖8年嘅男友金珉基喺棒球場公開求婚，兩人將於今年11月17號拉埋天窗。
由於洪允花出道多年都係圓碌碌身形，所以為咗展現靚靚一面結婚，佢近期努力透過運動及節食減肥，目前已經減咗30磅。洪允花連日來都有喺Instagram公開自己嘅減肥餐單，只見有雞胸肉、生菜、蘿蔔、洋蔥等多種蔬菜，完全冇碳水化合物。而洪允花亦表示自己嘅目標係要減66磅，即起碼佢仲要減多36磅先達成目標，不過佢就相當有恆心去減，亦漸見成效，佢日前更新嘅相中已經見到佢塊面明顯瘦咗，令五官都立體咗。