【馮仁昭四圍超】兒子老公心中冇母親節靚靚被魔童差遣擔水

【蘋果日報】袁詠儀（靚靚）、鄧麗欣、任賢齊同梁漢文噚日現身山頂嘅「點滴是生命」活動，靚靚透露一直想帶囝囝魔童參與，點知囝囝同佢講：「今日係我假期，畀我休息吓，媽咪你去擔水。」靚靚就從魔童小時候已教佢珍惜食水，會限制佢嘅沖涼時間，刷牙洗臉都唔好長開水喉。
提到母親節將至，靚靚笑住話由於自己係嚴母，魔童從來冇表示，心中只有父親節，問到張智霖會唔會送手袋畀佢，佢就笑笑口話：「佢會話你又唔係我媽媽，不過我都唔係好緊張呢個節日，反而我會送花畀媽咪、奶奶，同阿仔啲契媽。」講到前晚慧妍晚宴，最後有冇同陳法蓉碰頭，佢就話自己有勇字冇尷尬：「我成晚不停同李丞責講風水命理相學，另一邊關之琳就講扮靚，成晚都好有得着，兼且人好多，冇乜機會同其他人打招呼。」
梁炳可樂代酒
此外，梁漢文提到已履行社會服務令，做文職工作，暫未有影響其他工作，喺旁邊嘅小齊就話梁炳係無心之失，仲爆佢好乖冇飲酒，梁炳話：「噚晚有同事生日，我去到時大家飲得好開心，我飲可樂都飲得好開心。」
撰文：馮仁昭