送絲巾請食葡國菜再慶功凌文龍感激契媽安安：個獎你有份

【蘋果日報】【Happy Mother's Day】現年31歲凌文龍，上月在香港電影金像獎頒獎禮憑《黃金花》奪最佳新人獎，早於2011年跟余安安在舞台劇《遍地芳菲》演兩母子結緣，之後以契媽契仔相稱，至去年凌文龍首次拍電影，安安索性兼任經理人，凌文龍今次攞獎，當然要感激契媽。
安安女兒呷醋
今個母親節，凌文龍特地請契媽食葡國菜兼再慶功，多謝契媽給他信心和力量去努力，凌文龍說：「拍呢部電影時你一路照顧我，呢個獎，你有份嘅。」安安聞言眼濕濕說：「我知道你對演戲嘅熱誠同埋潛質，所以今次攞到呢個獎，對你嘅肯定，我真係開心過我自己攞獎。」
問會否考慮正式上契時，安安笑說：「我一向唔鍾意契乜契物，初初佢叫媽咪，我細女覺得好奇怪，唔知係妒忌定係覺得好strange，佢話『做乜佢叫你媽咪呀？』佢有少少唔鍾意，咁不如叫契媽啦。」
學習隨遇而安
凌文龍表示工作上感到不開心時，往往得到契媽開解和鼓勵：「拍《黃金花》真係有好多嘢唔識，我會忟自己，好失落，契媽就會提醒番我，時間就係比你儲經驗，你有一個咁嘅過錯先至會成長。契媽係一個好隨遇而安嘅人，呢樣嘢我從佢身上學到。契媽好多時好平靜帶住微笑睇呢個世界同埋睇佢人生，呢個係我學習嘅一樣嘢。」凌文龍突然送上絲巾，令安安驚喜不已。
採訪：魯吉
服裝：Giorgio Armani
髮型：HAiR Eddie
場地提供：Bom Cusine