「小飯兜」半歲喇！JJ：怕錯過你成長的每一秒

【蘋果日報】樊少皇同賈曉晨（JJ）結婚兩年，愛女「小飯兜」唔經唔覺半歲大喇。兩公婆一直都冇將囡囡嘅正面曝光，昨日JJ終於破例，喺微博貼出多張囡囡嘅得意相，真係Cute到爆！
「小飯兜」皮膚白滑，五官精緻，眼大大、下巴尖尖，同媽咪JJ餅印一樣，堪稱小美人。喺爸爸媽媽嘅安排下，「小飯兜」去影咗一輯寫真靚相，見佢以唔同造型亮相，有浴袍look，冷帽裝、碎花裙，仲有公主look，有一張相更伸脷賣萌，電力十足。另一張全家福見JJ已成功收身，同抱住囡囡嘅樊少皇一齊合照，感覺好幸福有愛。
JJ留言：「親愛的寶貝，我們的小飯兜，從你出生、一周、滿月、百天、到現在半歲，媽咪時時刻刻陪着你，就怕錯過你成長的每一秒鐘，今天你半歲生日了，媽媽要跟大家一起分享這份快樂！希望寶貝身體棒棒的，每天快快樂樂，長大也是個樂觀快樂又聰明的好孩子。」