匯豐保險 新兵上場

【明報專訊】做保險同當兵有咩分別？睇嚟新上場嘅匯豐保險香港業務董事總經理梁偉邦（Robert Lang）最有資格同大家講，事關佢喺澳洲當過兵，官階去到中尉。佢話當兵最着重階級觀念，只要膞頭多粒花，其他人對住佢一定事事Say Yes，無得Say No。Robert轉做保險，家直屬老闆係匯豐香港區總裁馬凱博，同埋匯豐保險亞太主席兼行政總裁湯德信，但以佢喺保險界嘅專業角度，相信有咩意見都可以同老闆們有商有量，唔使再唯命是從。

上司同下屬嘅關係，好多時候下屬都只可以做個聽聽話話嘅打工仔，Robert可以同老細有商有量，當然有佢過人之處。佢喺匯豐保險同舊舖ING都係負責歐洲嗰邊嘅保險業務，亦喺澳洲擔任過ING嘅業務發展經理，可謂齊集各家之大成。

最厲害係Robert喺1991年入伍澳洲陸軍步兵後備役，1994年正式任命為軍官。當過兵自然高大又大隻，Robert今年仲會「處男下海」挑戰扒龍舟，即將開始準備，希望喺嚟緊嘅龍舟比賽之中，上年攞季軍匯豐保險隊，今年搶個冠軍返嚟！

落場扒龍舟 誓贏永明

話時話，近幾年嘅國際龍舟比賽都係由永明金融主辦，Robert好風騷咁話，就係要喺競爭對手之一永明搞嘅比賽奪冠，感覺寧舍好喎！哈哈，雖然匯豐喺新造保險同強積金嘅市佔率都係全港第一，但強積金投資表現就遠遠低於永明金融嘅基金，希望Robert都會喺呢方面都做番啲成績出嚟啦。