嫲嫲陳立品「港人老友記」

【蘋果日報】人稱品姨的陳立品（原名陳慧芳），50年代入行拍粵語長片，至70年代再踩入電視圈，影視作品逾300多部，包括《上海灘》演丁力母親，《賭神》演劉德華嫲嫲等等，最擅演問米婆、包租婆及三姑六婆等小人物角色，加上品姨經常在《獅子山下》演不同草根階層，因而被視為港人老友記。就連陳慧嫻《變變變》大碟的紮髻造型，亦被指是參考品姨。可惜品姨1990年7月病逝，享年79歲。
黃宗賜是品姨孻孫，因而最得品姨疼錫。儘管品姨逝世多年，黃宗賜仍清楚記得跟嫲嫲相處點滴：「佢成日捉住我睇劇本，因為佢對眼又唔係幾好，又唔係幾識寫字，睇就識，寫字就唔係幾好，有陣時要mark低啲嘢，我咪幫佢囉，同埋成日捉住我幫佢對劇本。佢好叻，乜嘢都冇問題，有次佢去大嶼山拍戲，要佢踩雪屐，佢又真係去踩雪屐，後尾跌斷咗隻手。我爸爸好嬲，嗌佢以後唔好拍啦。佢覺得拍戲好開心，因為大把人陪佢，佢又鍾意講笑。」
對於觀眾可能只記得他是「品姨個孫」，黃宗賜笑說：「咁我真係品姨個孫吖嘛！其實要嗌到個名都好難，你要做到街知巷聞，但我真係未去到呢個位置。」