陳立品離世後孫仔遭無綫冷待 轉行揸車　黃宗賜：人在，人情在

【蘋果日報】【《蘋果》專訪】53歲的黃宗賜是陳立品孫兒，78年《倚天屠龍記》飾演童年張無忌，是第一代電視童星，亦是無綫御用反叛青年，直至97年在娛圈銷聲匿迹。原來，黃宗賜早已轉行做司機，一做20年。談當年離開無綫因由，黃宗賜慨嘆：「人在，人情在。我阿嫲過身後仲對我好嘅，都有，但唔係公司。」當日被無綫狂減六成騷的黃宗賜，決定另闖新天地。
採訪：戴彩煥
黃宗賜這個名字，大家未必記得，但若說是陳立品孫兒，相信觀眾或會有印象。人稱「品姨」的資深演員陳立品，在電影和電視演過無數小人物，曾是香港人「老友記」，黃宗賜5、6歲便由嫲嫲帶入行，拍過《小太陽》、《幻海奇情》和《風雲》等劇，是第一代電視童星，代表作包括在鄭少秋版《倚天屠龍記》飾演童年張無忌，以及《新紮師兄》梁朝偉老友「喪昌」等等。
可惜，品姨90年病逝後，黃宗賜被無綫投閒置散，所演角色越做越閒，最後，在娛樂圈銷聲匿迹。原來，消失21年的黃宗賜，98年轉行做司機，應驗他在《新紮師兄》退出警校後轉行做司機志向，真的戲如人生。
做生意一鋪清袋
53歲的黃宗賜，日前在其荔枝角band房接受《蘋果》專訪，由少年到中年，黃宗賜發福不少，額上的火車軌，令他倍添滄桑感。
談及97年離開無綫原因，黃宗賜說：「同其他同事一樣，都係合約條件唔啱，本來一個月十個騷，cut到我得番四個，同我簽一年，我計過數，如果一年後佢唔同我簽，我長期服務金就會少咗百分之六十，所以我迫於無奈唔簽。」之後黃宗賜飛到馬來西亞拍劇，可惜金融風暴令大馬獨立製作公司倒閉，黃宗賜返港賣電話零件，結果又蝕本一鋪清袋，前路茫茫：「問朋友有乜好做，佢問介唔介意揸車，我話好，於是去做一啲政府外判工作，做咗好多年後，仲加入咗政府部門。」就這樣，黃宗賜轉行做司機，一做20年。
由藝人轉做司機，黃宗賜初時的確難以走出心理關口：「返工唔係好同人講嘢，後尾同成班同事相處耐咗、熟絡咗就冇嘢。」黃宗賜指所有同事都認得他是藝人，還問他會否開兩日工便返去拍戲。黃宗賜笑說：「其實份工好輕鬆，返工時間固定、收入固定，後尾仲多過喺TVB㖭，我臨走時都有萬幾蚊人工。」
怕批評拒返娛圈
品姨在生時，無綫對黃宗賜不薄，有不少角色發揮，直至90年品姨逝世後，黃宗賜覺得電視台對他已大不如前：「人在，人情在。我阿嫲過身後仲對我好嘅，都有，但唔係公司，傾合約嗰時有啲覺得唔同咗。可能我做得唔好，公司覺得我冇表現，開出嘅條件冇以前咁好，我咪唔做囉！」
可有興趣復出再做幕前？黃宗賜苦笑：「冇啦，自己都唔係好適應。我依家生活好靜，入返呢個圈好似要面對好多人。」黃宗賜自問不是演戲發燒友，不再適應幕前生活，更不習慣被人亂批評。他說偶然看到有網民說他吸毒甚至做馬伕：「依家有互聯網，你做成點都會畀人批評，有時又會無端端畀人攞出嚟研究討論，屈你都有，譬如話我吸毒，全部虛構出嚟，講到似層層，如果變番做公眾人物，要接受好多呢啲批評。」
如今有固定工作，09年與女友Carmen結婚後一直享受住二人世界，閒時與友人夾band jam歌，對曾經過着五光十色生活的黃宗賜來說，簡單便是快樂。