美國超A貨LV 呃埋店員

【明報專訊】小琴之前收到風，內地有兩間唔同品牌嘅超級名店，懷疑有售貨員將「超A」貨手袋當正貨袋賣畀啲客戶，但最近再聽聞另一個版本喺美利堅出現，就係有內地客喺LV正店買完手袋，轉個頭就攞住個款式一模一樣嘅「超A」假袋，同埋啱啱買完手袋嘅單據，返去間舖話買咗唔啱心水，要換另一個款，咁就成功偷龍轉鳳，結果畀一個袋嘅價錢，騙得兩個袋。

咪以為呢單嘢唔關你事，皆因連售貨員都分唔清原來自己已經收咗個冒牌貨，你可以想像，呢個擺喺正貨店嘅假嘢，分分鐘會畀你睇中，令你成為用真金白銀喺正貨店買「超A」貨嘅顧客。所以，之前江湖傳聞話有內地名牌正貨店售貨員，賣假貨畀個客，會唔會其實佢都係「無辜」嘅受害者？

真係天曉得。