福布斯新貴鄧耀 低調露面

【明報專訊】貿發局噚日舉辦時裝節，除咗靚衫，仲有靚鞋、靚手袋。香港鞋業總會舉辦咗一個鞋款設計比賽，噚日頒獎。鞋總主席、百麗國際（1880）主席鄧耀亦有出席支持活動。

早前福布斯公布本港富豪榜，鄧耀首次打入十大，排名第九。呢位富豪能夠喺地產掛帥嘅香港，殺出一條血路，賣鞋、代理運動服飾入圍，確實唔嘢少。不過佢噚日好低調，喺現場等睇鞋款花生騷，較少走動。小琴想邀請佢做吓訪問，佢都話工作好忙，未必有時間。百麗喺內地有逾1.3萬個分銷點、港澳有200幾個，一日巡5間舖，都要2000幾日先巡得晒。

講番噚日鞋款設計大賽嘅頒獎禮，全場大獎得主係一位16歲中三學生梁嘉俊，喺大埔三育中學讀書。對於一眾專業設計師嚟講，呢位學生青出於藍，佢屋企經營鞋廠，培養佢對設計嘅興趣，不過佢最希望做舞台設計工作，設計鞋款都係吸收經驗。