圓方邀水鼓隊賀新年

【明報專訊】仲有兩個禮拜就正式踏入兔年，唔少商場都出盡法寶，舉辦連串活動同大家歡度新歲。今個新年，港鐵旗艦商場圓方（Elements）就搞搞新意思，請嚟曾經喺08年北京奧運同上年亞運開幕表演嘅「奧運女子水鼓隊」首次嚟港獻技，為全港市民打響新一年咁話。

負責人港鐵投資物業總經理梁羨靈話，中國人最講「意頭」，深信「水為財」，亦鍾意大時大節打鑼打鼓慶祝，水鼓隊有氣勢之餘，有「水」仲有靚女，一定令現場觀眾為之驚嘆！

「奧運女子水鼓隊」由一班青春美女，帶同內藏彩燈嘅透明水鼓，配合精湛嘅熱舞表演，每打一下彩燈水鼓，就會出現幻彩飛揚嘅水花及隆隆鼓聲，實在係震撼而澎湃嘅視聽感受。梁羨靈估計，新春期間，圓方嘅人流同生意額可以有雙位數字嘅升幅㖭。