蘋果P輪打孖上

【明報專訊】一日一蘋果，唔係話小琴好喜歡食蘋果，而係近日美國蘋果嘅喬布斯請病假，搞到蘋果股價急插，揸咗蘋果股票嘅股民日日到實，心血少啲都唔掂！

香港無乜人買美股？的而且確，香港人比較少隔山打牛買美股，但香港人鍾意炒輪噃，好似德意志銀行早排出隻蘋果認購輪（10033）就輸死唔少散戶。

正當有散戶埋怨咬咗啖「毒」蘋果之際，德銀嘅10033噚日又因蘋果季度業績理想，急彈25％，低位撈咗10033嘅散戶應該執番唔少。

不過長遠嚟講，有得Call無得Put都唔係辦法，可能唔想畀人話出「毒」蘋果、又或者想平衡番一啲，聽聞德銀已經入咗紙出蘋果沽輪，一出就出兩隻，一隻10045行使價328蚊美金；另一隻10046行使價298蚊美金，分別喺7、8月到期。不過小琴認為，家陣買蘋果輪嘅人唔會再睇業績、銷售，反而係對賭緊喬布斯嘅身體健康狀况！