流感殺入財經界 匯豐CEO中招

【明報專訊】呢排流感肆虐，小琴公司雖未見疫情爆發，但原來流感病毒已經悄悄殺入財經界高層，話說噚日匯豐香港區CEO馬凱博原本約咗幾位傳媒管理層飯聚傾下偈，點知公關朝早突然打電話通知飯局要取消，點解？之唔係原定赴會嘅其中3位傳媒高層，連同主人家馬凱博都全部中晒招染咗流感，其中一個仲嚴重到感冒菌入腸，都咪話唔得人驚。

大家唔好睇小流感嘅殺傷力，噚日就有個調查話，有員工感染流感無戴口罩繼續返工，兩個禮拜已經惹病咗30個同事，所以你可以想像，如果匯豐呢餐「流感飯局」如常進行，個個傳媒老闆一邊食，一邊講，喺口沫橫飛之際，唔單止製造機會畀啲流感病毒大雜燴再交叉感染，飯後個個帶埋啲流感病毒返公司，一傳十，十傳百，分分鐘搞到間公司爆流感，嚴重影響生產力。

3傳媒頭頭原赴會 同告染病

不過話時話，雖然衛生署成日都呼籲市民，感染咗流感就唔好返工返學，要喺屋企休息下，但其實香港普遍老闆同伙計，都當「耳邊風」一於少理，甚至連自己已經出現初期流感病徵都唔知。咪話小琴唔醒你，醫生話，流感病發唔係淨係發燒、咳嗽、流鼻水㗎，如果你呢排突然覺得頭痛、成日周身肌肉痛同好攰、甚至出現肚屙同嘔吐情况，都可能係染咗流感，最好快啲去睇醫生。

至於馬凱博病情有幾嚴重，係唔係感染咗被形容為專攻「年輕力壯」一族嘅甲型H1N1新型流感，匯豐公關就無透露喇，小琴當然希望CEO同各位老總快啲好番啦。

報料電郵﹕piano@mingpao.com