趙樓神六萬元裝金身

【明報專訊】每年新春臨近，龍頭發展商長實（0001）都會搞一次「大龍鳳」，公布全年嘅賣樓大計，藉以向傳媒、「芬佬」等「展示肌肉」（Show Muscle是也）。套用祖國術語，「大龍鳳」另一「亮點」，就係售樓部各高層都會喺「樓神」、集團執行董事趙國雄帶領下，穿上特定服裝與傳媒見面，小琴記得去年係「軍佬LOOK」，今年就齊齊著上唐裝，大玩「中國風」。

用足兩両金 市值2.6萬

全場焦點，就梗係着住金色唐裝登場既「趙樓神」啦，佢身材高大，著住件金光閃閃嘅唐裝的確幾型仔，「樓神」同小琴講﹕「件衫係改良版金馬褂，舊年喺瀋陽訂造，做咗成5萬大元（人仔計、如果折算港紙就要成5.9萬元），最特別嘅地方，係上面嘅金黃色，係由真正黃金磨線而成，足足用咗兩両金（淨係黃金現價就值2.6萬幾港元）。 」金價近排屢創新高，所以「樓神」亦笑騎騎同小琴講：「除咗物業可以升值，估唔到自己件唐裝都可以升值！」