中海油鼓勵多做運動

【明報專訊】香港有好多怪現象小琴一直諗唔明，其中一個就係，香港人出名唔鍾意做運動，但商場入面嘅運動舖同埋旺角波鞋街永遠都塞滿人，件事就同港府一向好少投放資源落本港體壇，但又想申辦亞運一樣咁吊詭。其實有冇心鼓勵人做運動好易睇得出，好似中海油（0883）就每年資助2000蚊人仔畀員工做運動，認真體貼！

一年資助2000人仔

小琴噚日聽中海油聯席公司秘書蔣永智話，呢個福利並非高管獨有，只要係公司員工，每年就可享有2000蚊津貼，用嚟畀健身中心年費。唔怪得中海油好多高層都咁鍾意運動，老總傅成玉愛打golf，家派駐海外嘅肖宗偉喜歡行山，蔣永智就日日游水同跑步。

其實員工多啲運動自然少啲病痛，無形中請少啲病假，做嘢又醒神啲，計落有賺冇蝕，只係未必有好多老闆識咁諗，就連香港呢個所謂亞洲國際城市，都好似係外資企業先有鼓勵員工做運動嘅文化。所以中海油喺呢方面的確走得幾前，難怪佢哋咁鍾意「走出去」。