花旗高層買Icon放租

【明報專訊】近期因收樓爭議，搞到滿城風雨嘅西半山干德道「The Icon」，貨不對辦問題大多集中係「擅改」開放式廚房單位。之不過，小琴近日收到風，花旗高層Weber仔盧韋柏，原來都買咗The Icon。幸好Weber仔買咗個單位係17樓B室，並非位於風眼，近日佢好醒，剛剛以月租3.3萬元成功租出單位畀日籍租客，計番條數，帳面都有成3.8厘回報。

話時話，各路財經界人士，一定唔會對Weber仔感到陌生，事關Weber仔「官拜」花旗銀行環球個人銀行服務行政總裁兼總經理，不時出來代表花旗與一眾記者會面。

單位非開放式廚房 避過一禍

講開又講，「The Icon」一直由中原獨家代理，呢次有單位出現貨不對辦問題，搞到中原老闆施永青都出嚟親自解畫，噚日佢哋仲出新聞稿，話西半山地段物業由於鄰近中環商業區，喺優質白領租客支持下，租值一向得到保證，仲指有2個單位租出，但無詳細指出邊個單位。不過，據小琴的消息所知，呢兩個單位中，其中包括位於17樓B室，由一間Profit Eagle Trading Limited持有，公司董事為花旗高層盧韋柏，報住地址為薄扶林貝沙灣6期單位。呢個租咗出去嘅「The Icon」單位，面積781方呎，09年6月以約1038萬元買入，呎價約1.33萬元。以呎租42元計，同中半山SOHO 38 做緊嘅呎租大致相若。

至於另一個，傳聞就位於27樓B室，面積771方呎，早在「The Icon」出事前已租出，月租約2.8萬元，呎租約36元；以09年買入價1160萬元計，租金回報就只係得2.9厘。

報料電郵﹕piano@mingpao.com