港人心血Android機 有望年內出爐

【明報專訊】家潮流興玩智能手機，小琴都想趕上潮流，成日聽男性朋友講iPhone好，另一個話Android好，都唔知點揀。不過，原來香港都有由香港人設計嘅土炮Android智能手機。小琴噚日同幻音數碼（8248）始創人、科大兼職教授Dr Jack（廖家俊）食飯，佢忍唔住大賣廣告，叫大家支持佢公司設計嘅4.3吋屏幕Android手機。

Dr Jack話，已經同某個歐洲大品牌簽咗約，今年第2季落實生產幻音設計嘅Android電話，相信遲啲香港都會有得買。

幻音已與歐洲大品牌簽約生產

除咗電話之外，Dr Jack又話，幻音又喺美國申請咗多項專利，最近有一項，就係利用語音索引。只要你哼幾句音樂，「la..la..la」，就算走音都好，電腦都可以自動搵番隻歌出來，令到各位司機大哥可以揀歌之餘，又可專心留意路面情况。另外，公司有一項申請中嘅專利，就係耳筒心跳監察器。Dr Jack話，耳筒會出3條紅外線，透過血管量度心跳，真係幾新奇。

睇番公司股價表現，幻音噚日收報0.425元，升3.6%，同09年上市時嘅股價，仲有好大落差，真係唔知係股民覺得公司表現未夠好，定係反映咗社會近年對科技嘅重視程度。