縉城峰發展商嘉里 主席姊弟齊幫襯

【明報專訊】嘉里建設（0683）同市建局合作發展嘅西營盤「縉城峰」，舊年農曆新年前夕推出樓花時反應非常熱烈，原來當時連嘉里主席郭孔丞嘅家姐郭綺光都有份趁熱鬧，斥資3548.1萬元買咗兩個過千呎嘅單位，而主席細佬郭孔華更係新鮮滾熱辣，喺噚日買咗同樣係由嘉里發展嘅淺水灣樓盤「Belgravia」一個2800呎嘅豪宅單位連兩個車位，總值7600萬元。

嘉里噚日主動出稿交代呢幾宗「關連交易」，小琴當然第一時間睇吓啲樓盤交易價有無「異常」啦。先講家姐郭綺光喺舊年2月9日，即係樓盤初推時買嘅縉城峰第二座26樓C嘅1036呎單位，售價1393.3萬元，即平均呎價約1.3萬元。另一個第一座38樓A嘅1186呎單位，喺3月29日買，售價已經升至2154.8萬元，平均呎價約1.8萬。相對舊年2月初已有報道話縉城峰呎價將加價達1.9萬，呢兩個單位交易價都唔算特別貴。

至於細佬郭孔華噚日拍板簽訂臨時買賣合約購下嘅「Belgravia」21樓B座2790呎單位，作價7600萬元，平均呎價約2.7萬元，都算幾貼市價。