齋睇樓隨時執到金

【明報專訊】除咗利市、打麻將可以發新年財之外，原來睇樓都有機會可以發橫財。呢排主力重推西環貴價盤「維壹」嘅英皇國際（0163），噚日就公布，凡喺年初一至二月初二日期間（即係西曆2月3號至3月6號），所有參觀維壹示範單位嘅朋友，都可參加抽獎，大獎係999黃金足3両（價值超過3.83萬元）、二獎就係英皇鐘表禮券2萬大元、3獎係澳門英皇酒店旅遊套票（價值5000元），安慰獎就係元綠壽司coupon一嚿水。

好多地產商提供嘅賀年優惠，通常只限於買家，但英皇今次就比較大手筆，因為「齋睇唔買」嘅朋友一樣有中獎機會。不過，小琴發現，無論係鐘表禮券、旅遊套票、同埋元綠壽司，其實都屬英皇系公司；即係話，中獎朋友去消費同吃喝玩樂時，英皇一樣有生意做，可謂肥水不流別人田，高章！

至於近年新春買樓送黃金嘅例子，小琴就記得舊年華懋同中原地產合作時，凡在新春期間買馬鞍山「迎濤灣」2、3房嘅人士，分別可獲2両同3両黃金。

講開中原，佢哋繼之前大派花紅，讓員工過肥年外，凡係初一至初四開單嘅前線代理，都可獲500元開單利市，算是小小心意。

買名家匯 送12.8萬利市

新春無休嘅發展商仲有恒地（0012），佢哋除咗年初一晨咁早喺沙田「名家匯」舞龍舞獅外，同系8個貨尾盤嘅「行政樓層」特色戶亦有新春賀禮，買家可以獲贈12.8萬元利市，都夠一家幾口去日本豪一次。代理界老友又講，華懋旗下嘅青山公路「御濤」、「凱濤」嘅買家，正月十五日前買入單位，可獲贈送車位。

報料電郵﹕piano@mingpao.com