希慎贊助 《活在灣仔》柴灣上演

【明報專訊】灣仔「大地主」希慎興業（0014）當年決定將老街坊嘅集體回憶歷史建築利舞臺拆卸，變身為商場，小琴到今時今日都覺得好可惜，唔知係好嬲定好笑，最近希慎贊助一個名為「活在灣仔」嘅音樂劇，但卻因為喺區內租唔到表演場地，要走到去柴灣青年廣場綜藝館上演。

據希慎嘅公關介紹，呢個音樂劇係由春天實驗劇團嘅專業演員，聯同灣仔區內的業餘演員攜手合演，佢哋主力幫手做宣傳推廣同場地贊助，故事描繪灣仔區內居民見證過去幾十年灣仔點樣發展成一個最繁盛嘅商業同住宅區，劇中男主角仲會時光倒流返番70年代嘅灣仔，目睹當年利舞臺有幾巴閉架勢。

雖然套劇今個周六、周日先正式公演，但劇團演員前日已經率先喺利舞臺廣場演出一啲精彩情節做下推廣，希慎公關話，佢哋集團紮根灣仔區，套劇亦都係講灣仔人生活，原本大家都好希望可以喺區內為街坊表演，但係……就喺公關詳細解釋點樣難租場嘅時候，小琴腦裏只喺諗緊：如果利舞臺無拆，咪有場地囉！