夏佳理太太 請老公食檸檬

【明報專訊】港交所主席夏佳理噚日同行政總裁李小加，一齊出席兔年首個交易日開市儀式。兩位向出席者大派利市，每封公價20蚊，似乎未有跟隨通脹加碼。佢哋用嘅利市封，係港交所自家印製，印有「如意吉祥」。香港股市一日上落幾百億元，會唔會用「財源廣進」更加貼切呢？

唔舒服 檸檬水補身

夏佳理太太夏安麗（Johanna）亦一齊出席活動，佢係奧地利籍，派利市呢啲傳統動作，交畀老公負責。不過，小琴見Johanna做咗主席私人助理，不斷遞檸檬水畀老公飲，一杯接一杯。未到情人節，Johanna咁快請老公食檸檬？夏佳理話有少少唔舒服，所以要飲檸檬水補充維他命C，加強抵抗力。主席又話放年假期間，一家人去咗外地遊埠，前日先返香港，趕得切出席開市儀式。