【姐匙Talk】攣攣姐節目被叮　扮骨折遮醜

【蘋果日報】早排踏入豬年放咗幾日假，有內地幕後朋友嚟咗香港玩，Jessie同佢剝住瓜子八卦一番，呢位喺影視圈打滾多年嘅朋友，八咗一單關於「攣攣姐」未做巨星前嘅笑料，真係聽到笑爆嘴。
話說每年大年三十晚，內地官媒都會播新春節目，雖然作為香港觀眾會覺得悶到爆，但好多中港台藝人就覺得可以上呢個節目，就係代表紅星、巨星嘅身份，就算未做到紅星嘅三、四、五、六線藝人，可以上節目做佈景板都係一份「榮幸」。而N年前仲係新人嘅攣攣姐，畀佢等到一個機會，有朋友話可以介紹佢參與一個小角色。
造型突出惹禍
攣攣姐興奮到事先張揚晒畀朋友知，仲話自己有位老死係髮型師，會搵佢幫手搞個突出嘅造型，朋友都話會坐喺電視機面前捧場。直到節目播出當晚，朋友等極都唔見攣攣姐出現，大家都覺得好奇怪，過完年之後，朋友就又約攣攣姐出嚟，見到佢手臂打住石膏現身，大家以為佢受咗傷，紛紛圍住慰問。
點知，攣攣姐一肚氣咁向朋友訴苦，原來嗰位髮型師朋友，幫佢染咗個浮誇紫色頭，節目選角導演俾佢嘅造型嚇親，直接將攣攣姐叮出局，呢件咁辳嘅事，攣攣姐唔想俾人知，惟有諗咗扮骨折呢條屎橋，話自己受傷未能演出，佢班朋友聽到大笑。
撰文：Jessie
本欄逢周五刊登
【姐匙Talk】
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
長青網 - 一站式長者及護老者生活資訊網站