秋生用頭演戲撼鎮宇全身　阿Sa爭影后　「唔恨就呃你」

【蘋果日報】蔡卓妍（阿Sa）、曾美慧孜、黃秋生、吳鎮宇、余香凝及惠英紅等前晚到觀塘出席「香港電影工作者總會2019年春茗晚宴」，當中阿Sa和曾美慧孜、以及秋生和鎮宇均是今屆金像獎奪獎呼聲最高的影帝影后候選人。
惠英紅影定泳照
憑《非分熟女》爭影后的阿Sa透露正為頒獎禮物色戰衣，她直言要睇牌子及行頭：「好膚淺，但冇法，我都要隨波逐流。」問到奪獎信心？她坦言：「我答你冇信心就好假，有信心又好唔謙虛，所以我都唔識答。我話唔恨就呃你嘅，呢個係演員終極目標。」《三夫》的曾美慧孜被指是她的勁敵，阿Sa說：「我冇睇過佢部戲，不過入得圍已經好好。」曾美慧孜亦坦言對得獎有信心，更認同外界視她為阿Sa最大對手的說法：「是呀！我很喜歡聽她的歌。」此外，憑《翠絲》角逐女配角的惠英紅曾稱奪獎的話就着比堅尼泳衣派福利，她說：「之前影過輯，大家未睇過，我有存貨，大家唔使擔心。」
「有就沖喜唔刻意」
至於秋生和鎮宇分別憑《淪落人》及《逆流大叔》爭影帝，二人先鬥嘴作熱身，鎮宇說：「一定係秋生，佢用個頭嚟演戲吖嘛！頭以下都唔甩嘅，呢啲咪攞獎格囉。」秋生就表現輕鬆地說：「有就沖喜，唔會刻意，是但啦！」說到鎮宇的「用頭演戲是攞獎格」，秋生笑謂：「佢用成身都輸畀我個頭，我係得個頭做戲箒，佢用成個身咪輸囉。扒龍舟嘅唔使睇已經知佢勁。佢輸畀我個頭，我又輸番畀佢個舟囉！」
此外，秋生前晚與Crisel Consunji及葉童等到又一城出席電影《淪落人》慈善優先場，Crisel入圍最佳女主角及新演員表示驚喜和榮幸。另外，昨日黃秋生、袁富華及導演陳詠燊等出席演藝學院精英校友對談，陳詠燊坦言希望憑《逆流大叔》獲獎：「我係想要，希望大家成全。」
採訪：曹家誠、盧妹、黃曉妍
攝影：陳俊強、仇志德
長青網 - 一站式長者及護老者生活資訊網站