【馮仁昭四圍超】朴信惠巴黎睇騷心情好　楊丞琳早餐賞羅浮宮

【蘋果日報】 【巴黎直擊】台灣女星楊丞琳、內地女星范冰冰細佬范丞丞、春夏、韓星鄭麗媛、姬嘉鐸（Gal Gadot）、Sam Smith同Amy Welsey等，於香港時間噚日凌晨出席巴黎秋冬時裝周。
楊丞琳對品牌讚不絕口，佢話平時好留意品牌嘅出品，而今次出席嘅造型，都係品牌為佢打造。近日巴黎氣溫急降又落雨，楊丞琳話最緊要唔好冷親，因離開巴黎後要去澳門演出，工作排得好密，所以要保護身體。問到有冇機會去玩？佢話逗留時候比以前多，因為有時差，所以會早起身去食早餐，而且係望住羅浮宮食早餐，感覺好舒服好輕鬆。佢仲話會同團隊去食越南河粉，因為巴黎有好多呢類型嘅小店。
范丞丞雀躍
范冰冰去過無數次睇騷，但細佬范丞丞就首次參與，所以心情好雀躍，范丞丞話：「第一次看騷，第二次來巴黎，雨天的巴黎好夢幻，騷場就像夢一樣，還能提升審美，真好！」之後佢去後台同主帥合照。另外，韓星朴信惠以一頭清爽短髮出席另一品牌時裝騷，心情大好嘅佢，不時向場內人士微笑揮手，同場仲有黑珍珠納奧美金寶（Naomi Campbell）等。
撰文：馮仁昭
長青網 - 一站式長者及護老者生活資訊網站